so-susan'scorner

　　說回東京之旅，出發前例牌看了甚麼「東京100HITS」之類的指南，聞說近年興起立食。即使我不是日本通/東京通，也知道立食並非甚麼新興玩意，好多駅外都有立食「梳爸」店，只是立食串燒店與壽司店也來湊湊熱鬧罷了。

　　流落新宿的首夜，正為消夜何處著落、兩頭望之際，經過立食壽司店，當然要試。引領我進內的是75Yen一件，抵﹗味道勝過100Yen碟的三葉好多好多。計計數，即使大食到要廿件才填飽肚，都只不過係105港紙。立食店依舊有茶、薑供應，又有嬸嬸遞毛巾，不介意罰企把酒談歡的平民為數亦不少，當然，啤酒另計。

　　計畫行程的時候，安排了不少新地方，汐留是其一。汐留屬新開發區，有日本電視台大樓駐紮，不過最出名的是大樓底下的汐留拉麵，人氣非常，常見長龍。當日好好彩，非因唔駛排隊，而是E好脾四，願陪我曬太陽。

　　講食之前，先介紹阿師傅。阿師傅個樣都幾上鏡，而且好有功架，表演慾仲好旺盛。話說等食等到頭咢咢，見阿師傅響廚房隔住塊玻璃show off，拎住個篩同個水殼起勢咁fing，搞到水花四濺，食客等食之餘就當睇表演。究竟裏面有無麵？我睇唔到，因為佢fing得太快，加上塊玻璃被霧氣籠罩。我當時只係諗：「瑮頭喺度，一定睇到呱呱叫。」講番碗招牌特製汐留拉麵又確係好食，可能真係同阿師傅fing果幾下有關，最抵讚係塊叉燒，係未試過咁好味。臨完場前，見阿師傅派阿四邀請隔籬位妹妹仔到攝影房（由此可見阿師傅係幾鍾意出鏡）影相留念，阿師傅仲係擺晒甫士果隻，佩服﹗

　　對大型連鎖式食店好感不大，總覺得這些店不見風情又少了驚喜。到原宿，幫襯光麵——分店遍佈東京的連鎖拉麵店。從老闆願花錢大賣廣告來看，此店利潤應該很不錯。大熱天裏，一碗自家製酸辣冷麵色彩繽紛，賣相大佳，又食得我「lamlam脷」，只是遺憾忘了試那宣稱「世界至強杏仁豆腐」。

　　由原宿走到涉谷，穿插在橫街陋巷的店舖多不勝數，潮舖林立，借旅遊書的說話——「來這裏朝聖的人」很多，尤其是周末，潮人通街走，男男女女，成對連群，縱橫交錯的馬路及密密麻麻的行人很都市。

　　很多人來到這裏是要瘋狂購物的，可卻不是我，逛倒是逛得腿酸了，多看少買，價錢都是適可而止，算不上是瘋狂，也不是血拼，反而E在這裏的收穫豐富得多，更叫我大出血﹗

　　走累了，要找個地方歇歇。想不到，剛巧走到這家叫我們都難忘的咖啡店附近，兩人二話不說，要「重遊舊地」。那年，第一次邂逅這店，因為我肚子痛，要上廁所。雖說涉谷乜都有，不過，走在街頭想要找廁所解決時，實在搔爆頭。再次偶遇，希望那份難忘的驚喜猶在。


量杯盛載的重量級凍咖啡。

　　久別重逢，店是老樣子，裝璜依舊，店員仍是「細細粒」。這家性格豪邁又粗獷的二樓咖啡店，不拘小節，裝璜與食物帶點墨西哥風情，不單止味美，即叫即炮製，上枱時必定熱辣辣飄煙又送香，而且大大份叫人開心不已。超大的餐牌附有圖片，即使你看不懂日文，店裏的「細細粒」女店員笑容可掬，樂於向異邦人解釋，且從不皺眉。


　　離我們預定晚餐時間尚有一段頗長時間，不過，為了敘舊，我們點了豐富的「下午茶」。加大碼太陽蛋下面，是夠咬口又肉汁豐富的漢堡扒，配以惹味汁，最底一層是炒飯，睇頭十足，上枱時香氣四溢，圖文並茂也難教你嚐到那份美味與滿足感。接著是滋味小食——墨西哥粟米片配以芝士、番茄，以小鐵鍋烤焗。飲品是重量級量杯凍咖啡。由於食物夠重量級，不少肌肉大隻佬幫襯，好此道者不妨來碰碰運氣。


地址：涉谷區神南1—9—4號NC ビル2F（對面是涉谷消防局）
電話：3464-8304